തിരുവനന്തപുരം കോവളത്ത് ഉപരാഷ്ട്രപതി സി.പി. രാധാകൃഷ്ണന്റെ വാഹനവ്യൂഹത്തിന് നേരെ ബൈക്ക് ഓടിച്ചുകയറ്റിയ സംഭവത്തിൽ രണ്ട് പേർ അറസ്റ്റിൽ. വളളക്കടവ് സ്വദേശികളായ അഷ്കർ, നാദിർഷാ എന്നിവരെയാണ് പൊലീസ് പിടികൂടിയത്. സംഭവത്തിൽ ഗുരുതര സുരക്ഷാവീഴ്ചയാണ് ഉണ്ടായത്.
ബാലരാമപുരത്ത് ഔദ്യോഗിക പരിപാടിയിൽ പങ്കെടുത്ത ശേഷം വിമാനത്താവളത്തിലേക്ക് മടങ്ങുന്നതിനിടെയാണ് സംഭവം. തിരുവല്ലം ഭാഗത്തുനിന്നെത്തിയ ബൈക്ക് കോവളം ജംക്ഷനിൽ സുരക്ഷാ ഉദ്യോഗസ്ഥർ തടയാൻ ശ്രമിച്ചെങ്കിലും യുവാക്കൾ വാഹനം നിർത്തിയില്ലെന്നാണ് വിവരം.
തുടർന്ന് സുരക്ഷാ ഉദ്യോഗസ്ഥർ വിവരം പൊലീസിന് കൈമാറി. പിന്നാലെ കാഞ്ഞിരംകുളത്ത് നടത്തിയ പരിശോധനയിലാണ് ഇരുവരെയും പിടികൂടിയത്. പൊലീസ് നടത്തിയ പരിശോധനയിൽ യുവാക്കൾ മദ്യലഹരിയിലായിരുന്നുവെന്നാണ് വിവരം.
ഉപരാഷ്ട്രപതിയുടെ വാഹനവ്യൂഹം കടന്നുപോകുന്നതിനിടെ സുരക്ഷാ നിയന്ത്രണങ്ങൾ മറികടന്ന് ബൈക്ക് മുന്നോട്ടെടുത്തതാണ് സംഭവത്തിൽ വലിയ സുരക്ഷാ ആശങ്കയ്ക്ക് ഇടയാക്കിയത്. സംഭവത്തിൽ പൊലീസ് വിശദമായ അന്വേഷണം തുടരുകയാണ്.
